Nagpahimangno ang Iligan City Disaster Risk Reduction and Management Office (ICDRRMO) sa mga residente nga nagpuyo duol sa mga bukid, bakilid, ug landslide-prone areas nga magpabiling alerto ug magbantay-bantay sa panahon nga kusog ang ulan.
Sumala ni Sander Bughaw, Operation and Warning Section Head sa ICDRRMO, andam kanunay ang ilang opisina nga moresponde sa bisan unsang emerhensiya nga masinati sa dakbayan, ug kompleto usab sila sa mga kagamitan alang sa pagresponde ug pagluwas.
Dugang pa ni Bughaw, sa panahon nga masinati ang sunod-sunod nga pag-ulan, posibleng mohumok ang yuta nga mahimong hinungdan sa pagdahili o landslide.
Nunot niini padayon usab ang ilang pagmonitor sa mga residente nga nagpuyo daplin sa suba, tungod kay adunay posibilidad nga kalit nga mosaka ang lebel sa tubig kung magpadayon ang kusog nga ulan.
Dugang niini , magpadayon ang ICDRRMO sa 24/7 monitoring sa mga lugar nga kasagarang apektado sa baha, kauban ang Iligan City People’s Council (ICPC) aron masiguro ang kaluwasan ug kaandam sa komunidad.
