Gi-freeze na sa Anti-Money Laundering Council (AMLC) ang kinatibuk-ang P5.2 bilyon nga kantidad sa mga kabtangan sa mga indibidwal ug kompanya nga giingong nalambigit sa mga anomalosong proyekto sa flood control.
Matod ni AMLC Executive Director Matthew David, nagpaabot pa usab sila sa pagsumitir sa ubang bank accounts ug mga presyo sa ubang propyedad nga gi freeze ubos sa unom ka freeze order gikan sa Court of Appeals.
Bisan paman wa gibutyag sa opisyal sa AMLC ang mga ngalan sa mga indibidwal o kompanya nga sakop sa freeze orders, matod niya nga naglakip kini sa pipila ka mga kanhi opisyal sa Department of Public Works and Highways (DPWH), mga kontraktor ug ilang mga kakunsabo sa mga kurapsyon sa mga proyekto sa pagbaha.
Sa pagkakaron, ang AMLC nag-freeze sa kinatibuk-ang 1,671 ka bank accounts, 58 ka insurance policy, 163 ka motor vehicles, 99 ka real property, ug 12 ka e-wallet accounts. Gimugna sa opisyal ang maong pamahayag atol sa pagpirma sa memorandum of agreement (MOA) tali sa AMLC ug DPWH niadtong Huwebes, Oktubre 23.
Diin ang MOA nagtumong sa pag-institutionalize sa information sharing ug collaboration tali sa duha ka ahensya sa pag-imbestiga ug pagtubag sa money laundering ug mga related financial crimes.
Photo courtesy to:Inquirer.net
