Giplano sa Philippine National Police o PNP nga dugangan pa ang gidaghanon sa mga motorsiklo nga gamiton sa kapulisan aron mas mapaspas ang ilang pagresponde sa mga insidente ug krimen.
Matod kang PNP Chief General Jose Melencio Nartatez Jr., importante ang motorsiklo sa operasyon sa kapulisan, ilabina sa pagresponde sa mga lugar diin lisod makaagi ang mga sakyanan.
Gipahayag ni Nartatez nga dili nila gusto nga mahitabo sa tinuod ang kasagarang makita sa mga salida, diin maulahi ang mga pulis sa pag-abot sa crime scene.
Matod pa niya, dako og tabang ang mga motorsiklo aron mas paspas nga makaresponde ang mga kapulisan sa ilang mga nasakupan. Padayon usab ang ilang pagpapatrolya aron mapugngan ang mga krimen ug mapalambo ang seguridad sa mga komunidad.
Una nang nakadawat og mga motorsiklo ang pipila ka PNP stations gikan sa Department of the Interior and Local Government o DILG isip kabahin sa mga lakang aron mapaspas ang pagresponde sa mga insidente sa krimen.
Gilauman nga ang dugang nga mga motorsiklo makatabang sa kapulisan sa pagpatuman sa ilang mga buluhaton, ilabina sa pagresponde sa mga emerhensiya ug pagpalig-on sa police visibility sa mga komunidad.
Photo courtesy: Philippine News Agency
