Nagmalampuson ang Philippine Statistics Authority o PSA Cotabato, sa ilang gipahigayong School Visitation and Outreach Activity sa Datu Mantawil Elementary School sa Bongolanon, Magpet, isip kabahin sa ika-13 nga anibersaryo sa ahensya. Pinaagi sa kalihokan, napaduol ang nagkalain-laing serbisyo ug tabang ngadto sa mga estudyante ug komunidad.
Gihatagan og school supplies ang mga estudyante gikan Kindergarten hangtod Grade 3, samtang nakadawat usab og pagkaon ang tanang estudyante gikan Kindergarten hangtod Grade 6. Libre usab nga gihatagan og civil registry documents ang 30 ka estudyante, nga gikan sa mga pamilyang adunay pinansyal nga kalisdanan.
Dugang nga serbisyo ang National ID Registration, aron mas mapaduol sa mga residente ang importante nga government identification service. Makatabang kini sa mga kwalipikadong benepisyaryo sa pag-angkon og dokumento nga gikinahanglan sa nagkalain-laing transaksyon ug serbisyo sa gobyerno.
Pinaagi sa maong inisyatibo, gipakita sa PSA Cotabato ang padayong paningkamot sa pagtunol sa mga komunidad nga labing nanginahanglan og tabang ug serbisyo. Sa kinatibuk-an, ang outreach activity nahimong oportunidad sa paghiusa sa serbisyo publiko, pagpakabana ug suporta alang sa mga estudyante ug ilang pamilya.
Photo courtesy: PSA Region XII Cotabato
