Gitubag sa Police Regional Office 12 ang unom ka bulag nga report kabahin sa giingong online threats of violence sa South Cotabato, Sultan Kudarat, General Santos City ug Koronadal City. Mitungha ang mga maong report human sa insidente sa Banga, diin padayon nga gisusi sa kapulisan ang matag hulga bisan pa man nga kadaghanan niini nalambigit sa copycat nga binuhatan, tsismis o prank nga walay tinuod nga tuyo sa pagpanglutos og kapintasan.
Nalakip sa pipila ka insidente ang mga menor de edad, busa nakigkoordinar ang kapulisan sa mga ginikanan, eskwelahan, barangay officials, DSWD ug RACU 12. Ang mga kaso nga nalambigit ang mga bata gitagad base sa ilang edad, kahimtang ug mga balaod nga magamit sa maong sitwasyon.
Pinaagi sa digital investigation, intelligence monitoring ug paspas nga pagtubag, nasulbad ang unom ka kaso pinaagi sa pagdakop, boluntaryong pagsurender, pag-ila sa mga nalambigit o pagtugyan sa tukmang legal ug social welfare authorities. Nakuha usab sa kapulisan ang mga cellphone, screenshots ug uban pang digital evidence alang sa dokumentasyon ug forensic examination.
Samtang, gipahayag ni PRO 12 Regional Director PBGEN Alan B. Manibog, nga seryosong gitagad sa kapulisan ang matag hulga nga mahimong makaapekto sa kaluwasan sa mga estudyante ug eskwelahan. Matud pa niini, dili hulaton sa kapulisan nga mahitabo ang aktuwal nga insidente una molihok, hinuon dayon nilang susihon ang report, tukion ang gigikanan sa hulga ug hatagan kini og tukmang aksyon subay sa balaod.
Photo courtesy: PNP Police Regional Office 12
