Nakakumpiska ang mga otoridad og unom ka sachet sa gituohang shabu atol sa buy-bust operation sa Purok 5, Barangay Inas, M’lang, Cotabato, alas-7:45 sa gabii niadtong Septiyembre 27, 2026. Ang operasyon nahimo ubos sa koordinasyon sa PDEA ug gipangunahan sa Drug Enforcement Unit sa M’lang MPS, kauban ang CPPO-PPDEU ug PIU.
Gibanabana nga mokabat sa 0.15 gramos ang kinatibuk-ang gibug-aton sa nakumpiskang gituohang ilegal nga droga. Usa sa mga sachet ang napalit pinaagi sa poseur buyer, samtang lima pa ang nakuha gikan sa possession sa giilang alyas “Nok,” 50 anyos, minyo, mag-uuma ug residente sa Barangay Poblacion B, M’lang, North Cotabato.
Dugang sa gituohang shabu, nakuha usab ang 500 pesos nga marked money ug usa ka gamay nga silver metal case nga giingong gigamit sa pagbutang sa mga sachet. Gidala ang suspek ug mga ebidensya sa M’lang MPS alang sa dokumentasyon ug hustong disposisyon.
Samtang ipailalom sa laboratory examination sa Cotabato Provincial Forensic Unit ang nakumpiskang gituohang shabu. Ingon man, giandam na usab sa kapulisan ang tukmang kaso batok sa suspek ubos sa Sections 5, 11 ug 12 sa Republic Act 9165 o Comprehensive Dangerous Drugs Act of 2002.
