Gipalapdan karon ang gihimong search and retrieval operations sa LDRRMO sa magtiayon nga sakay sa bao-bao human naapil ug natabunan sa pagdahili sa yuta ug pagkahugno sa Bukidnon to Davao Road sa may Overview, Sitio Kipolot, Barangay Palacapao, Quezon, Bukidnon niaging adlaw.
Giila ang missing nga sila Ely Ubatay ug Thelma Ubatay taga Purok 9, Kahusayan, Kitaotao. Gibutyag ni Municipal Disaster Risk Reduction Management Office Responder Ivy Tondo sa pakighinabi sa Juander Radyo Malaybalay nga hangtod karon wala pa gihapon nakit-an ang magtiayon kung diin gikompirmar sa ilang mga anak nga personal miadto sa maong lugar nga namissing ilang ginikanan ug ilang bao-bao.
Samtang sumala pa ni Municipal Mayor Pablo “Poling” Lorenzo III atol sa iyang pagbisita sa disaster site, hugtanon siyang nakigkoordinar sa Department of Public Works and Highways (DPWH) alang sa posibleng pag-abri sa access roads aron dili maundang ang biyahe nga makaapekto sa ekonomiya lungsod.
Nasayrang ana-a sa 100metros ang gitas-on sa nahugno nga bahin sa dalan, samtang ang gilawmon niini ana-a sa 100metros kung asa mokabat sa mga 400metros ang kabag-on sa nidahili nga yuta.
Sa karon temporaryong dili maagian ang dalan sa tanang klase sa sakyanan hinungdan nga dawat-dawat nalang ang sistema sa pagtransfer sa mga pasahero ug produkto pinaagi sa tabang sa MDRRMO, kasundalohan ug PDRRMO.
Ang rota gikan sa Bukidnon paingon sa Davao mao ang San Fernando, to Talaingod to Tagum City road ug sa mga heavy trucks didto gayud moagi sa Damulog to Cotabato libot paingon sa Davao Region.
via: LGU – Quezon
