Nagpahimangno ang Bangko Sentral ng Pilipinas (BSP) sa planong pagkuha o demonetize sa ₱1,000 nga papel nga kuwarta, tungod kay posibleng mas daghang kadaut ang resulta kaysa kaayohan.
Sa tunga sa isyu sa korapsyon nga may kalabutan sa mga flood control projects, giingon ni BSP Governor Eli Remolona Jr. nga gitun-an pa karon sa bangko sentral ang maong panukiduki, apan gipahimangno niya nga daghang nasud ang nakasinati ug negatibong epekto sa sama nga lakang.
Gideskripsyon ni Remolona ang maong sugyot nga “tantalizing” o makapadasig paminawon, apan dili kini yano nga isyu. Iyang gikumpara kini sa kasabihan nga “cutting off one’s nose to spite one’s face,” nga nagpasabot nga mahimo pa kini makadaut kaysa makatabang.
Ang kaniadto nga finance secretary Cesar Purisima maoy una nga mipasaka sa ideya sa pag-demonetize sa ₱1,000 ug ₱500 bills, aron mapalisod sa mga kurap nga opisyal ang pagtago ug pagdala sa dili legal nga kuwarta pinaagi sa pagpataas sa logistical barriers.
Niadtong Setyembre, si Brice Hernandez, usa ka gipahawa nga engineer sa Department of Public Works and Highways (DPWH), mitestigo sa Senate Blue Ribbon Committee nga adunay kapin sa ₱1 bilyon nga cash nga gidala gamit ang pito ka van aron ihatag sa usa ka kongresista. Ang panel nag-imbestiga sa mga anomaloso sa mga proyekto sa flood control sa nasud.
Dugang pa ni Remolona nga epektibo gihapon ang limitasyon sa withdrawal nga ₱500,000, bisan pa adunay mga reklamo. Giingon niya nga nagpabilin nga lig-on nga polisiya kini samtang nagapaminaw gihapon ang BSP sa mga kabalaka sa publiko.
Gipasabot usab sa gobernador nga ang mga bangko gikinahanglan nga i-report ang tanan nga transaksyon nga moabot o molapas sa ₱500,000, bisan cash o dili, kay kini maoy threshold sa mga cash transactions. Ang mga bangko kinahanglan usab magsumite ug suspicious transaction reports nga naglangkob sa detalye sa gigikanan sa kuwarta ug nagtan-aw kung tugma ba kini sa income sa kliyente.
Sa laing bahin, niadtong miaging semana, ang Anti-Money Laundering Council (AMLC) nakakuha sa ika-unom nga freeze order gikan sa Court of Appeals batok sa mga asset nga nalambigit sa flood control scam. Ang maong order naglakip sa 39 ka bank accounts, 4 ka insurance policies, ug 59 ka real estate properties.
Photo credits to: eLegal Philippines
