Gilauman sa Department of Trade and Industry (DTI) nga mahuman sa tuig 2026 ang negosasyon kalabot sa reciprocal tariff rate tali sa Pilipinas ug Estados Unidos (US).
Mahinumduman nga kaniadtong Hulyo, gianunsyo ni US President Donald Trump ang pagpahamtang og 19% export tariff sa mga produkto nga gikan sa Pilipinas. Sumala sa DTI, dili pa kini pinal ug kasamtangan pa kining gihisgutan.
Atol sa budget hearing, gipamahayag ni DTI Secretary Cristina Roque nga ning kasamtangan padayon pa gihapon ang ilahang negosasyon kalabot niining taripa.
Apan kini gikuwestiyon ni Senate Subcommittee Chairperson Senator Imee Marcos kung nganong gisingil kita sa 19% nga taripa kung dili pa kini final.
Gipasabot ni DTI Undersecretary Allan Gepty nga usa kini ka unilateral imposition sa US, busa gipadayon pa gihapon sa Pilipinas ang negosasyon aron makakuha og mas makatarunganon nga kasabutan.
Matud pa niya, wala pa gihapon bisan usa ka nasud o ekonomiya ang aduna’y final o pinirmahan nga kasabutan sa US kalabot niini.
Gipahayag usab ni Gepty nga nakasumite na ang Pilipinas og lista sa mga produkto nga gusto nilang ma-exempt sa taripa, apil na niini ang mga produktong agrikultural sama sa lubi (coconut) ug pinya (pineapple).
Photo courtesy: Rappler
