Gilauman nga mopakita sa iyang kusog si Alex Eala, sa opening round diin iyang makalaban ang qualifier sa pagsugod sa 2025 Japan Women’s Open nga ipahigayon sa Utsubo Tennis Center sa Osaka, Japan.
Wala pa hinganli ang kaatbang ni Eala, sanglit nagpaabot pa siya sa modaog sa qualifying tournament una pa niya matino kung kinsa ang iyang makalaban sa Round of 32 sa 250-level WTA event. Kung modaog si Eala sa Round of 32, iyang makalaban ang mananaog tali sa third seed Elise Mertens sa Belgium ug Cristina Bucsa sa Spain.
Gipildi ni Bucsa si Eala, sa ikaduhang hugna sa US Open niadtong Septyembre. Adunay kinatibuk-ang premyo nga $275,094 ang Japan Open ug magpakita sa pipila sa labing maayo nga mga magdudula sa kalibutan.
Lakip kanila mao ang kanhi Grand Slam champion Naomi Osaka sa host Japan, ingon man ang second seed nga si Linda Noskova sa Czech Republic.
Mosalmot usab sa torneyo sila si Filipino-Canadian Leylah Fernandez, kinsa maoy fourth seed, Bianca Andreescu sa Canada, Emiliana Arango sa Colombia, Hailey Baptiste sa United States, ug Katie Boulter sa Great Britain.
Nanghinaot si Eala nga adunay maayong kampanya sa Japan Open, aron mapalig-on pa ang iyang kahigayonan nga makasulod sa Top 50 sa WTA rankings. Kasamtangang anaa sa Rank No. 54 sa WTA rankings, kung asa mao usab kini ang iyang bag-ong career-high.
Photo courtesy to:ABANTE
