Nakatala sa bag-ong Guinness World Record ang usa ka babayeng Australian bodybuilder human niya makompleto ang 733 ka pull-up sulod lamang sa usa ka oras.
Ang maong atleta giila nga si Jade Henderson, 32 anyos, nga nakabuhat og average nga kapin sa 12 ka pull-up kada minuto aron mabuak ang kanhing record niadtong 2016 nga 725 pull-ups nga gihuptan ni Eva Clarke.
Gikompirma sa Guinness World Records ang iyang kalampusan, ug giila kini nga opisyal nga bag-ong world record alang sa “Most Pull-Ups in One Hour (Female).”
Gipadayag usab ni Henderson nga sa una pa, nagplano siya sa pagbuak sa 24-hour pull-up record, apan nasamdan siya sa iyang pagbansay. Bisan pa niini, nakabuhat siya ug 3,500 ka pull-up sulod sa 12 ka oras — nga usa na usab ka dakong kalampusan.
Bisan og naputol ang iyang tinguha sa 24 oras, ang iyang dedikasyon ug determinasyon misangpot sa pagkab-ot sa world record sulod sa usa ka oras, nga nakahatag og inspirasyon sa daghang babaye ug mga atleta sa tibuok kalibotan.
Photo Courtesy to:Guinness World Records
