Nagtunhay karong nga mga problema sa kabarangayan ang kawalay kaugalingong mga luna ug mismong mga barangay hall, labi na sa mga numbered barangay sa syudad.
Sagad nga kahimtang sa mga barangay hall ang gamay o piit nga espasyo, kulang nga mga pasilidad ug walay kaugalingong barangay hall ug igo lamang nangabang.
Ang mga barangay hall ang nagsilbing dangpanan sa katawhan nga nanginahanglan sa ilahang mga opisyles busa angayan lang nga adunay saktong pasilidad nga mudawat o mo-cater sa mga residente aron mapaabot ang sakto ug episyente nga serbisyo nga ilahang gikinahanglan.
Busa, atol sa regular session, gipaabot ni Konsehal Aga Suan kining kasamtangang kahimtang karon sa mga kabarangayan sa syudad labi pa nga ang barangay ang pinakabasic unit sa gobyerno.
Natuki sab nga ang ubang barangay maglisod sab sa pagpangita og luna nga pagatukuran sa ilahang mga barangay hall tungod na sab sa kamahal sa kantidad sa mga yuta.
Nadesisyunan sab sa konseho nga tuki-on ug tun-an kini nga concern sa komitiba sa Barangay Affairs aron nga mahatagan og kasolbaran.
