Wala gisirado sa Office of Civil Defense (OCD) Region 9 ang posibilidad sa pag-igo sa “The Big one” sa Zamboanga Peninsula Region gumikan sa mga trenches o mga fault nga posibleng mo-trigger kun adunay kusog nga mga pagtay-og.
Matod ni OCD 9 Regional Director Atty. Ruel S. Halanes, ang susamang magnitude nga miigo sa Visayas mamahimo nga masinati sa Zamboanga Peninsula ug angay lang wad-on ang huna-huna sa publiko nga ang “The Big One” mahitabo lang sa Luzon.
Gisaysay ni Atty. Halanes, dili na layo ang maong posibilidad gumikan may history na ang Zamboanga Peninsula nga gitay-og sa kusog nga linog ug may nahitabo pang secondary hazard pa nga mao ang Tsunami nga miigo sa syudad sa Pagadian.
Giingon pa ni Atty. Halanes, isip kabahin sa Hazard maturity sa publiko, angay nga dawaton ang kamatuoran nga mahitabo ang “The Big One” sa Zamboanga Peninsula aron mao kini ang mahimong sukaranan sa himoon nga mga pagpangandam sa mga katawhan kun moigo ang mga katalagman.
Alayon niini, gisubli ni Atty. Halanes iyang pagpasidaan sa publiko sa paghatag ug pagtagad sa mga panawagan sa ilang buhatan sa angay nga mga pagpangandam aron mapabilin ang disaster resiliency sa Zamboanga Peninsula.
Photo Courtesy to:PIA
