Giila si June Mar Fajardo sa San Miguel Beer, nga PBA Most Valuable Player sa ika-9 nga higayon sa Leo Awards nga gipahigayon alang sa mga best players sa miaging Season 49 ayha ang PBA Season 50 opening sa Smart-Araneta Coliseum.
Gipildi ni Fajardo ang mga karibal nga sila si Robert Bolick sa NLEX Road Warriors ug kanhi NorthPort Batang Pier forward Arvin Tolentino, kinsa anaa na sa Korea, human nanguna sa record nga 19.2 points, 15.1 rebounds, 3.1 assists ug 1 block ngadto sa 41.1 statistical points.
Kini ang ikatulong sunod-sunod nga MVP ni Fajardo, human ang iyang unom ka sunod-sunod nga kadaugan. Nanguna usab sila si Fajardo, Bolick ug Tolentino sa Mythical First Team uban nila CJ Perez sa Philippine Cup champion SMB ug Calvin Oftana sa TNT Tropang Giga nga nidaog sa unang 2 ka conference nga gilangkuban sa Governors’ Cup ug Commissioner’s Cup.
Nibida usab si Fajardo sa All-Defensive Team kauban si Stephen Holt sa Ginebra, Glenn Khobuntin sa TNT, Joshua Munzon sa NorthPort ug Zavier Lucero sa Magnolia.
Samtang, nangulo si Scottie Thompson sa Mythical Second Team uban nila ni Lucero, teammate Japeth Aguilar, Roger Pogoy sa TNT ug Justin Arana sa Converge.
Napili usab si RJ Abarrientos sa Gin Kings isip Rookie of the Year human mirehistro og 12.7 point, 3.6 assists ug 2.8 steals aron pildihon sila Sedrick Barefield sa Blackwater, Caelan Tiongson sa Rain or Shine ug Kai Ballungay sa Phoenix.
Sa laing bahin, ang Samboy Lim Sportsmanship Award gihatag kang Gian Mamuyac sa Elasto Painters sa Season 49.
Photo Courtesy to:Spin
