Giablihan na niadtong byernes sa kagabii ang gihulat nga Night Café sa Capitol Compound Dakbayan sa Malaybalay nga Maghatag ug bag-ong kahayag ug kinabuhi sa gabii dinhi sa probinsya sa Bukidnon.
Gipangulohan ang maong tinuig nga kalihukan sa Department of Tourism Northern Mindanao Office ug sa Lokal nga Pangagamhanan sa Bukidnon, diin giimbitaran ang lokal nga mga negosyante sa pag-display sa ilang nagkadaiyang produkto ug pagkaon nga molungtad hangtod sa pagtapos sa tuig.
Sa eksklusibong pakighinabi sa Juander Radyo Malaybalay, sa Provincial Tourism Staff sa Provincial Tourism Office, nga si Brynn Nambatac, nagkanayon nga ang Night Café masaksihan matag Byernes, Sabado ug Domingo ug giawhag usab niya ang mga interesado nga mamaligya nga dili na maglangan kay limitado lamang ang mga pwesto niini.
Dugang pa, iyang giklaro nga adunay mga kinahanglanon sama sa Business Permit, Sanitary Permit gikan sa Provincial Health Office (PHO), ug Health Card, aron masiguro nga luwas ug limpyo ang pagkaon nga ihatag ngadto sa publiko nga molungtad hangtod Disyembre 28, 2025
Tumong niini nga aktibidad mao ang pagdani ug daghang turista ug mga katawhan sa lalawigan aron matilawan ang lamian ug talagsaong mga pagkaon sa Bukidnon, ug aron usab malipay ang mga pamilya sa usa ka makalingaw ug mabulokong kasinatian sa gabii
via: Provincial Tourism Office
