Temporaryong gisirado ang Munich Airport sa Germany human nakit-an ang sunod-sunod nga paglupad sa mga wala pa mailhing drone sa lugar.
Nakansela ang 17 ka flight sa alas-10 niadtong nakalabay nga gabii, samtang dili moubos sa 3,000 ka pasahero ang naapektuhan sa insidente.
Tungod niini, 15 ka inbound flights ang wala nakalanding sa Munich Airport ug gipa-divert ngadto sa kasikbit nga mga tugpahanan.
Pag-abot sa alas-5 sa buntag, subling giablihan ang airport human masiguro sa mga awtoridad nga luwas na kini gikan sa hulga sa mga nakitang gipalupad nga drone.
Sumala sa Danish Prime Minister nga si Mette Frederiksen, bisan pa man wala pa matino sa mga awtoridad kung kinsa ang nagpalupad sa mga drone, klaro matud pa nga adunay hulga sa Europe ug kini mao ang Russia.
Gipanghimakak kini sa Kremlin diin ilang gibutyag nga wala silay kalabutan sa mga insidente ug wala usab sila nakalapas sa balaod sa kahanginan sa Estonia.
Samtang, kahinumdoman nga nahitabo ‘sab ang susamang insidente sa ubang tugpahanan sa Denmark, hinungdan nga gibawal sa nasud ang tanang pagpanglupad sa drone sa ilang kawanangan.
Konektado kini sa ginahimong pagpangandam sa Denmark alang sa summit sa mga lider sa Europa sa Copenhagen karong semanaha, diin hisgutan ang pagpahugot sa seguridad sa rehiyon ug ang padayong suporta sa Ukraine batok sa Russia.
Photo Courtesy to:Kurdistan
