Gipanghingusgan ni Konsehal Maximo Rodriguez III ang pagbisita balik sa implementasyon sa ordinansa kalabot na sa Solo Parent Subsidy of 2022 ug PWD Social Pension of 2023 kagahapong adlawa atol sa ika-dose nga regular session sa konseho sa syudad.
Subay sa duha ka mga ordinansa ang mga indigent nga solo parent, ma lalaki man o babae makadawat og usa ka libo nga subsidy matag bulan, samtang P500 ang madawatan sa mga indigent nga PWD isip binulan nga pensyon.
Apan gibutyag ni Konsehal Rodriguez nga daghan silag nadawatan nga reklamo nga hangtod ning kasamtangan, wala pa kini mahatag nga cash assistance ngadto sa kapin libo ka mga benepisyaryo.
Gani, aduna nay listahan sa mga benepisyaryo nga na-verify, na-identify ug na confirmed na sa CSWD ug gigahinan na sab kinig minilyon nga pondo sa nilabay pa nga mga katuigan. Alang sa Solo Parent Subsidy, aduna kini budget allocation nga P12 million ug P15 million alang sa PWD pension.
Pila ka bulan ang wala mahatag nga subsidy sa mga solo parent ug PWD, sugod bulan sa Hunyo hangtud Disyembre tuig 2024. Nadesisyonan sa konseho nga subayon ang mga hingtungdang departamento nga nag-implementa niini nga mga ordinansa particular na sa finance department.
Photo Courtesy to:cdeocitycouncil
