Balhog na sa prisohan ang duha ka lalaki nga nasakpan sa managlahing operasyon sa Iligan City ug Tubod, Lanao del Norte, tungod sa ilang kalambigitan sa pagpamaligya ug illegal nga droga.
Gibanabana nga 90 gramos sa shabu nga adunay market value nga P612,000 ang nasakmit sa maong mga operasyon, uban ang nagkalain-laing drug paraphernalia.
Unang nadakpan si alias Brad, 46 anyos, mag-uuma ug residente sa Purok-11, Barangay Malingao, Tubod, Lanao del Norte, pinaagi sa usa ka buy-bust operation nga gipahigayon sa iyang balay. Nakuhaan siya og 13 ka sachets sa gituohang shabu nga adunay gibug-aton og 20 gramos ug gibanabana nga nagkantidad og P136,000.
Sa pagkakaron, si alias Brad anaa na sa kustodiya sa Tubod Municipal Police Station ug giandam na ang pagsang-at sa pormal nga kaso.
Sa laing bahin, nadakpan usab si alias Kyle, 22 anyos, residente sa Barangay Suarez, Iligan City, sa laing operasyon sa syudad. Nakuha gikan sa maong suspek ang lima (5) ka sachets sa gituohang shabu nga adunay gibug-aton nga 70 gramos nga adunay standard drug price P476,000.
Gikustodiya na usab karon si alias Kyle sa Iligan City Police Station ug giandam na ang kaso batok kaniya ubos sa Republic Act 9165, ang Comprehensive Dangerous Drugs Act of 2002.
Nunot niini gipasidunggan ni PBGEN Rolando M. Suguilon, Regional Director sa PRO-10, ang kapulisan nga nahimong kabahin sa maong kalampusan. Nag-awhag usab siya sa publiko nga ipadayon ang kooperasyon sa mga awtoridad pinaagi sa pagsumbong sa mga kadudahang kalihokan sa ilang komunidad.
