Pormal nang giturn-over sa Office of the Presidential Adviser on Peace, Reconciliation and Unity (OPAPRU), ang tseke nga nagkantidad sa P48 million pesos isip pasiunang bayad sa pagatukurong kongreto nga tulay sa Barangay Pisompongan Midsalap Zamboanga del Sur, karong bag-o.
Ang seremonya gihimo sa Pavilion Gym, Barangay Dao Pagadian City atol sa Demilitarization of Surrendered Loose Firearms & Scholarship Grant Ceremony nga gipangunahan ni OPARRU Secretary Carlito Galvez, Jr. nga gidawat ni Zamboanga del Sur Governor Divina Grace Yu ug Midsalip Mayor Elmer Soronio.
Matud ni Galvez, ang iyang pagbalik mao ang pagtuman sa mando sa Presidente Ferdinand Marcos Jr. nga makatukod og tulay sa lungsod sa Midsalip Zamboanga del Sur.
Sigun ni Galvez, natandog ang presidente human mi-viral sa social media nga buhis buhay nga pagtabok sa suba sa mga estudyante, hinungdan nga gipasusi sa Presidente niadtong bulan sa Agosto og nakita niini nga dili lang isa kun dili duha ka tulay ang angay buhaton.
Kahinumduman, napahigayon na ang ground breaking ceremony sa maong tulay sa miaging adlaw diin nagkantidad ug P60 milyon ka pesos ubos sa Payapa at Masaganang Pamayanan (PAMANA).
Ang pagtukod sa konkretong tulay sa lugar kini aron masiguro sa gobyerno nga luwas ug protektado ang mga kabataan sa ilang pag-eskwela ug pagpauli panahon sa kusog nga pagbaha.
