Ipakatap sa nagkalain-laing lugar sa Kidapawan City ang napulo ka speed readers, aron mamonitor ang dagan sa mga sakyanan nga mobiyahe sa mga nag-unang dalan sa dakbayan.
Mismo si City Mayor Pao Evangelista ang mipahibalo niini atol sa gipahigayong City Peace and Order Council (CPOC) meeting niadtong nakalabay nga adlaw sa Mayor’s Conference Room.
Ang maong mga speed readers, ibutang sa mga barangay sa Amas, Paco, Binoligan ug Sikitan, diin daghang mga sakyanan ang kanunay nga moagi. Matag speed reader nga ibutang sa mga kalsada sa Kidapawan, adunay CCTV camera nga makadakop sa mga rehistrado nga plate number sa mga sakyanan.
Ang dagan sa trapiko sa nahisgutang mga dalan gibantayan sa command center. Kung adunay mag-overspeeding nga mga sakyanan, ma-detect dayon kini sa command center tungod sa solar-powered speed readers ug CCTV cameras.
Bisan sa lawom nga kagabhion ug kangitngit, klaro nga makita sa command center ang pagrehistro sa plaka sa sakyanan pinaagi sa night visioned solar-powered camera.
Nipadayag sa ilang pasalamat ngadto sa Mayor, ang mga sakop sa CPOC tungod matud pa, nga dako og tabang ang nahisgutang mga ekipo aron malikayan ang disgrasya sa mga kalsada.
Photo Courtesy to:Inside Kidapawan
