Nakasurvive ang usa ka 2-anyos nga batang lalaki, pinaagi sa pagkaon lamang og mga junk foods human namatay ang iyang 28-anyos nga inahan sulod mismo sa ilang balay sa Cangnan county, Wenzhou, Zhejiang province.
Kahibaloan nga niadtong Agosto 17, gisulod sa kapulisan ang balay human wala na motubag si Zheng Yu sa mga tawag ug mensahe sa iyang higala.
Didto ilang nadiskubrehan nga patay na si Zheng Yu sa iyang kwarto. Ang iyang anak nga ginganlan og Mianmian nag-inusara sulod sa pipila ka adlaw.
Tungod sa walay katabang, napugos ang bata nga mokaon sa bisan unsang iyang makita sama sa jelly, snacks, daot nga kalabasa, ug herbal tea nga nagkatag sa higdaanan.
Pag-abot sa kapulisan, nakita siyag hugaw nga diaper. Usa ka silingan ang mitabang kaniya dayon gilimpyohan siya sa banyo, gihatagan og bag-ong sinina, ug gipakaon og noodles nga adunay prito nga itlog.
Human niini, gidala ang bata sa ospital aron masusi ang iyang kahimtang. Kining makapasubo nga hitabo nakapukaw og dakong simpatiya ug diskusyon sa social media sa China, labi na sa kahimtang sa mga ginikanan nga nag-inusara sa pag-atiman sa ilang mga anak.
Photo courtesy to:Viral karon
