Upat ka bag-ong demonstration event ang gidugang alang sa NCAA Season 101 nga magsugod karong Oktubre 1 sa Smart Araneta Coliseum. Kini mao ang golf, gymnastics, boxing ug weightlifting, matod ni NCAA Management Committee chairman Melchor Divina sa Mapua.
Kini tungod usab sa pakigtambayayong sa NCAA sa Philippine Sports Commission (PSC) nga gipangulohan ni chairman Patrick ‘Pato’ Gregorio. Ang upat ka demo events ipahigayon sa ikaduhang semester nga maghatag sa NCAA og igong panahon nga makigtambayayong sa National Sports Associations (NSAs) sa golf, gymnastics, boxing ug weightlifting.
Ang Tokyo Olympics gold medalist nga si Hidilyn Diaz gipaabot nga manguna sa pagpatuman sa weightlifting sama sa iyang gihimo sa miaging 2024 Batang Pinoy.
Sa laing bahin, bag-ong format ang ipatuman sa basketball ug volleyball tournaments sa NCAA Season 101. Nagkanayon ang representante sa Jose Rizal University Management Committee nga si Paul Supan kagahapon nga ang mga koponan bahinon sa duha ka grupo ug adunay play-in phase nga sundan sa quarterfinals ug pareho nga best-of-three series sa semifinals ug finals.
via: NCAA
