Gikalampag ang kadalanan ug nagsaba-saba ang mga ning salmot sa lihok protesta lakip na pag-awhag sa mga motorista nga moserbato sa ilahang mga sakyanan kini isip simbolo sa pagpakusog sa ilahang tingog diha sa pagpanawagan nga batukan ang nagkagrabe nga problema sa korapsyon sa nasud.
Kagahapong adlawa, atol sab sa ika-53 nga kasumaran sa Martial Law, duha ka hugna sa lihok protesta ang gipahigayon dinhi sa dakbayan sa Cagayan de Oro nga gisalmutan sa mga taong simbahan, kababaenhan, kabatan-unan ug uban pang sektor nga nagalaum nga adunay manubag nga mga opisyales sa gobyerno nga nalambigit sa korapsyon sa mga flood control projects.
Ilahang gipadayag ang ilahang kasuko ug kadismaya labi pa nga kining dako ug binilyon nga pondo nga nakupit sa pipila ka mga tao pwede pa untang mabuhos sa mga proyekto ug programa nga labing makabenepisyo ang mga Pilipino sama nalang sa edukasyon, panglawas, agrikultura ug dugang suhulan sa mga mamumuo.
Gipunting sa trabahante nga si Jaspher Mabuloc gikan sa grupong United Coca-Cola Logistic Employee Association-NORMIN-FCCU-Sentro, nga kining binilyon nga giwaldas sa mga politiko naggikan sa buhis sa yanong katawhan nga sama niyang nagapaniningkamot sa matag adlaw aron lang mabuhi ang pamilya.
Dili sab matago ang iyahang kadismaya tungod sa dugay na nilang ginapanawagan nga usbaw suhulan nga hangtud karon wala pa gihapon nila matagamtaman samtang ang mga dagkong politiko nabuhong sa binilyon nga pondo.
