Nagdeklara si Center for International Law President Atty. Joel Butuyan nga walay igo’ng basehan ang mga balita kabahin sa kasamtangang kahimtang sa panglawas ni kanhi presidente Rodrigo Duterte nga hinungdan sa pagkalangan unta sa confirmation of charges karong Setyembre 23.
Matod pa ni Butuyan, base sa mga nangaging panayam sa mga anak sa kanhi presidente, ilabi na kang Vice President Sara Duterte, klaro nga anaa sa maayong kahimtang sa sulod sa detention center ang ilang amahan.
Iyang giingon nga kini nga mga lakang usa lamang sa ilang mga baseless claims aron makaseguro og interim release gikan sa International Criminal Court (ICC).
Dugang pa ni Butuyan,Nahibalo si Duterte sa tanang panghitabo ug sa iyang gibuhat, busa klaro nga ang gipangbuhat sa iyang defense team puro lamang delaying tactics human gisalikway ang ilang mga nangaging mosyon.
Samtang, gihulagway usab niya nga usa ka political move ang gihimo ni Nicolas Kaufman, legal counsel ni Duterte, nga mipangayo kang Presidente Ferdinand Marcos Jr. nga tugutan makapauli sa Pilipinas ang kanhi opisyal.
Matud pa, padayon nga gigamit sa kampo sa Duterte ang interes sa mga diehard Duterte supporters (DDS) aron mudaog sa umaabot nga 2028 national elections.
Photo courtesy to:PNA
