Kumpiyansa ang Department of Energy (DOE) nga makab-ot sa Pilipinas ang tumong niini nga 35% nga renewable energy (RE) share sa power generation mix pag-abot sa 2030, bisan pa sa mga pagkalangan sa ubang proyekto ug sa mga pagbag-o sa polisiya sa Estados Unidos.
Sa forum nga “State of Philippine Energy” nga gipahigayon sa Economic Journalists Association of the Philippines (EJAP), giingon ni DOE Undersecretary Mylene Capongcol nga magpokus ang ahensya sa pagtuman sa mga naka-line up nga proyekto aron masiguro nga kini mahuman sa tukmang oras.
Base sa Philippine Energy Plan 2023–2050, ang target sa nasod mao ang pag-angkon og 35% RE share sa 2030, 50% sa 2040, ug pagdominar sa renewable energy sa power mix paghidangat sa 2050.
Sa pagkakaron, anaa na sa 24% ang renewable energy share sa nasod.
Wala usab nabalaka si Capongcol sa posibleng epekto sa anti-renewable energy stance ni US President Donald Trump, tungod kay kadaghanan sa mga renewable energy investors gikan sa Pilipinas, China, ug uban pang mga nasod sa Asya.
Sa laing bahin, matod ni Energy Regulatory Commission (ERC) Chairperson Francis Juan, lahi ang kahimtang sa Pilipinas kung ikumpara sa US sa aspeto sa energy resources, ug mas limitado ang lokal nga mga tinubdan sa fossil fuel.
Dugang pa, sumala ni EDC AVP Allan Barcena, aduna silay bag-ong geothermal exploration sa Mindanao ug apil na usab ang Indonesia. Gawas sa geothermal, gibantayan usab sa DOE ang offshore wind energy.
Matod ni Capongcol, aduna’y potensyal ang Pilipinas nga makapamugos og 178 GW gikan sa offshore wind, nga mas dako pa kaysa sa kasamtangang installed renewable energy capacity nga 7.05 Gigawatts. Gilauman nga makamugna ang offshore wind sa 19 ngadto na sa 50 gigawatts paghidangat sa 2050.
Photo courtesy of Department of Energy FB Page
