Angol ang duha ka traffic personnel human nadasmagan sa motorsiklo giingong gimaneho sa hubog nga driver alas 10:50 sa gabii nakalabayng adlaw sa Sayre Highway, Purok 9, Barangay Sumpong, Malaybalay City Bukidnon. Giila ang mga biktima sila Juan Carlos Fortich 45 anyos, Edmund 40 anyos, pulos Traffic Management Center-Malaybalay personnel.
Sa pakighinabi sa Juander Radyo Malaybalay kang Traffic Operation Officer III Agustin Cepeda nasayrang niadtong panahona ang duha ka biktima nagbarog sa lugar samtang nag-asikaso sa dalan uban ang traffic investigator team, sa usa ka aksidenti, dihang kalit gibanggaan sa Yamaha Mio nga motorsiklo nga nagikan sa Barangay Kalasungay paingon sa sentro sa dakbayan, nga gimaneho ni Frances Salinsagan, 24 anyos, walay lisensya, ug residente sa Barangay Iba, lungsod sa Cabanglasan kinsa gituohang ubos sa impluwensya sa ilimnong makahubog.
Tungod sa kakusog sa impact, nalagpot ang duha kinsa nakahiagom og bali sa tiil ug collarbone sa tuo nga bahin sa abaga kung asa pabilin pang giatiman sa balay-tambalanan.
Desidido ang pamilya sa nahisgutang traffic personnel mopasaka sa kaso batok driver kinsa gibalhog na sa Malaybalay City Police Station samtang gipaabot ang tukmang disposisyon.
via: TMC – Malaybalay City
