Mitahan ang walo ka miyembro sa Bangsamoro Islamic Freedom Fighters (BIFF) ug nanumpa sa ilang pagkamatinud-anon sa gobyerno sa usa ka seremonya nga gipahigayon niadtong Huwebes sa Barangay Kabengi, Datu Saudi Ampatuan, Maguindanao del Sur.
Gibutyag ni Major Gen. Donald Gumiran, ang commander sa 6th Infantry Division, nga ang walo ka miyembro sa BIFF unang mitugyan sa ilang mga armas panggubat ug improvised explosive devices ngadto sa 90th Infantry Battalion sa wala pa sila pormal nga misaad sa pagbag-o sa atubangan sa mga Army officials ug mga lokal nga opisyales atol sa surrender rite nga gipahigayon sa 90th IB headquarters sa Barangay Kabengi, Datu Saudi Ampatuan.
Sumala ni Gumiran, nagtinabangay ang mga opisyales sa 90th IB, hilabi na ang commanding officer nga si Lt. Col. Luqui Marco, ug ang commander sa 601st Infantry Brigade nga si Brig. Gen. Edgar Catu, uban sa mga lokal nga opisyales sa Datu Saudi Ampatuan ug sa ubang mga lungsod sa Maguindanao del Sur sa pagdasig sa walo ka violent religious extremists nga mosurender aron matabangan sila sa 6th ID ug sa nagkadaiyang ahensya sa gobyerno nga makabalik sa ilang pamilya.
Sa lain pang report nila Marco ug Catu, gihatagan ni Datu Saudi Ampatuan Mayor Bassir Banjo Utto ug mga representante sa Ministry of Public Order and Safety-Bangsamoro Autonomous Region in Muslim Mindanao og inisyal nga cash assistance ug pagkaon ang walo ka misurender nga BIFF members aron magamit nila sa pagbalik sa ilang tagsa-tagsa ka barangay.
Naabot na sa 1,712 ka miyembro sa BIFF ug kaalyado niini nga Dawlah Islamiya nga susamang responsable sa pagpanghadlok ug pagpamomba sa Central Mindanao sukad 2014 – ang misurender ngadto sa mga yunit sa 6th ID ug sa Police Regional Office-Bangsamoro Autonomous Region sulod lang sa milabay nga tulo ka tuig.
