Nanawagan og dinalian nga tabang sa gobyerno ang mga multi-cab drivers sa dakbayan sa Tandag tungod sa padayon nga pagsaka sa presyo sa petrolyo nga dako kayo ug epekto sa ilang inadlaw nga kita.
Matod sa mga drayber, misamot ang ilang kabug-aton sa panginabuhi human sa sunod-sunod nga pagtaas sa presyo sa gasolina ug diesel nga giingong may kalabutan sa tensyon sa Middle East.
Sumala sa usa ka multi-cab driver nga si Francisco Bitallar, dili na igo ang ilang adlaw-adlaw nga kita tungod kay nagpabilin lang nga pareho ang minimum nga pamasahe nga ilang ginasingil sa mga pasahero.
Tungod niini, ilang gihangyo ang lokal ug nasyonal nga gobyerno nga maghimo og konkretong lakang aron matabangan ang transport sector, sama sa posibilidad sa fuel subsidy o pagreview sa pamasahe aron mabalanse ang kita sa mga drayber ug malikayan ang dugang nga kalisod sa ilang pamilya.
Sa pagkakaron, naglaum ang mga multi-cab drivers sa Tandag nga madungog ang ilang tingog ug matagaan sa solusyon ang nagkataas nga presyo sa petrolyo nga padayon nga nagpasamot sa ilang kahimtang.
