Nadakpan ang duha ka mga Chinese nationals ug tulo ka Pilipino sa hiniusang operasyon batok sa illegal mining nga gihimo niadtong Martes, Marso 3, sa Purok 8 Blocking, Barangay Wasian, lungsod sa Rosario Agusan del Sur sakop ning rehiyon sa Caraga.
Sumala sa report nga gipagawas sa Police Regional Office 13 (PRO 13), ang operasyon gipahigayon sa mga operatiba sa Regional Mobile Force Battalion 13, Provincial Intelligence Unit sa Agusan del Sur Police Provincial Office, Rosario Municipal Police Station, uban ang mga personahe sa Community Environment and Natural Resources Office Bunawan.
Giila ni Marcial Mariano Magistrado IV, Regional Director sa PRO 13, ang mga nadakpan nga sila: Alyas “Chen,” 50-anyos, Chinese national ug giingong financier sa grupo; Alyas “Ty,” 55-anyos, Chinese national ug giila usab nga financier. Ang duha ka langyaw parehong lumad sa Hubei Province, China.
Nadakpan usab ang tulo ka Pilipino nga giila nga: Alyas “Boy,” 36-anyos, laborer ug residente sa Esperanza, Agusan del Sur; Alyas “Jean,” 36-anyos, backhoe operator ug taga Marilog District, Davao City; Alyas “Jenny,” 41-anyos, residente sa Bunawan, Agusan del Sur.
Narekober sa mga awtoridad ang duha ka excavators, generator set, water pump, 12 ka artificial turf mats, ug duha ka wooden pans nga gibanabanang mokantidad og kapin Php6.1 milyon.
Gikasuhan ang mga nadakpan tungod sa paglapas sa Sections 102 ug 103 sa Republic Act 7942 o Philippine Mining Act of 1995, ug gipasaka na ang kaso sa Provincial Prosecutor’s Office sa Prosperidad, Agusan del Sur.
Sa pahayag ni RD Magistrado, nagpabilin nga determinado ang PNP Caraga ug ang ilang mga kaabag nga ahensya sa pagpalig-on sa kampanya batok sa illegal mining ug uban pang krimen nga makadaot sa kinaiyahan ug natural nga kahinguhaan.
Photo courtesy: PRO13
