Mibakwit ang usa ka pamilya human naapektuhan sa pagdahili sa yuta nga miresulta sa pagpangliki sa yuta sa bukirong bahin samtang gihimo ang dalan gikan sa Sitio Kipaling, Barangay New Compostela, sa lungsod Damulog kung asa nagkutay padulong sa lungsod sa Kadingilan, Bukidnon, Setyembre 3, 2025.
Sa esklusibong pakighinabi sa Juander Radyo Malaybalay kang LDRRMO II James Patrick D. Colegio, head miingon nga ang insidente nahitabo pa niadtong Lunes Setyembre 01, apan ulahi na sila napahibalo bahin niini.
Gikumpirma sa buhatan nga dunay pagdahili sa yuta ug naapektuhan ang usa ka pamilya nga nagpuyo sa balay nga hinimo lamang sa light materials, nga anaa sa maayong kahimtang human sa kasamtangan gipapuyo sa balay sa ilang paryente nga kagawad sa barangay.
Dugang pa ni Colegio, gisusi kini sa mga eksperto ang hinungdan sa pagdahili sa yuta kung asa usa sa ilang gilantaw nga anggulo mao ang kahumok sa yuta, ug posibleng naapektuhan kini sa ongoing nga konstruksyon sa dalan diin gibana-banang mokabat sa kapin (1/4) sa hektarya sa yuta ang naapektuhan.
Sa karon temporaryo nga gisirado ang dalan nga naapil sa pagdahili alang sa kaluwasan sa mga molabay sa dapit. Samtang giabisohan usab ni Municipal Mayor Mel Buro, pinaagi sa buhatan sa MDRRMO Damulog, ang mga residente sa lugar nga magmatngon ilabina kung dunay kusog nga ulan.
via: Dante Limpag
