Padayon nga gimonitor sa DOST-PAGASA ang usa ka Low Pressure Area (LPA) nga anaa sulod sa Philippine Area of Responsibility (PAR), nga nahimutang 670 kilometro East Northeast of Virac, Catanduanes. Aduna kini gamay’ng posibilidad nga mahimong bagyo apan gilauman nga mag-usab pa ang kahimtang niini sulod sa 24 oras.
Gipahibalo sa ahensya nga magpadayon ang mga pag-ulan sa tibuok nasud tungod sa epekto sa Southwest Monsoon o Habagat. Mas maapektuhan ang pipila ka lugar sama sa probinsya sa Davao del Norte, diin posible ang pagbaha ug pagdahili sa yuta tungod sa kusog nga ulan.
Base sa ulahing datos sa Provincial Disaster Risk Reduction and Management Office (PDRRMO) sa Davao del Norte, normal pa ang lebel sa tubig sa Menzi Bridge-Santo Tomas, Magupising Bridge-Tagum River, Pagsabangan Bridge, Libuganon River ug Saug Dam.
Samtang ang kahimtang sa kadagatan nag-range sa 0.6 hangtod 1.5 meters ang pagbalod. Natala usab ang minimum temperature nga 24.3°C alas 6:00 sa buntag ug maximum temperature nga 29.2°C alas 11:00 sa buntag. Ang pagsubang sa adlaw natala alas 5:44 sa buntag samtang ang pagsalop niini alas 6:08 sa gabii.
Tungod sa hulga sa kalamidad, nagpahimangno ang mga otoridad nga magpabilin nga alerto ug kanunay nga mag-monitor sa mga update sa panahon aron malikayan ang kadaot ug katalagman.
Photo courtesy to: DOST PAGASA
