Patay ang usa ka lalaki, human kining gipusil sa Purok Durian, Barangay Singao, Kidapawan City, alas 8:30 sa buntag niadtong, Agosto 31, 2025.
Giila ang biktima nga si Baltazar Compasion, hamtong ang pangidaron ug residente sa Purok 5, Barangay Balindog, sa nahisgutang syudad.
Sa report sa Kidapawan City Police Station, nakadawat ang ilang buhatan og tawag may kalabutan sa nahisgutang pagpamusil ug dali nga girespondihan ang naasoy nga report.
Sa inisyal nga imbestigasyon, sakay ang biktima sa usa ka itom nga XRM, adunay plakang 6937 LF ug pag-abot sa lugar sa insidente, gipusil ang biktima ug naigo sa toong bahin sa iyang dughan nga miresulta sa iyang hinanaling kamatayon.
Dali usab nga nisibat ang wala pa mailhing suspek human sa insidente. Sa karon, padayon ang ginahimong imbestigasyon sa otoridad, aron masuta ang motibo sa pagpamusil lakip na ang posibleng pag-ila sa suspek.
Photo courtesy to:JPEE TOCMO
