Gidagsa sa libu-libong mga tawo ang Guadalupe, Nuevo León, Mexico niadtong Hunyo atol sa usa ka dakong kalihokan diin nakab-ot nila ang tulo ka Guinness World Record pinaagi sa pagluto sa pinaka daghang ginisa sa tibuok kalibutan.
Sa gipahigayong La Discada 2025 festival, gigamit sa mga organizers ang usa ka 23-pies diameter nga kawali, nga gideklarar usab nga pinakadako sa kalibutan. Didto nila giluto ang ilang tradisyonal nga pagkaon sa Mexico nga Discada, nga mitimbang og 2,509 kilo ug opisyal nga giila nga largest stir-fry.
Kini adunay sagol nga sausage, karning baka, baboy, bacon, kamatis, sili, sibuyas ug beer. Human maluto, kini gipuno sa libu-libong tacos. Sulod lamang sa usa ka oras, nakahimo og 13,215 ka tacos, nga nakapahimo usab kanila sa record sa most tacos served in one hour.
Kapin 100 ka culinary students ang nitabang sa preparasyon, samtang mga 10,000 ka tawo ang nakatilaw sa pagkaon. Ang sobra nga pagkaon gipanghatag sa mga charity ug ampunan.
Ang maong kalihokan dili lang nagpamatuod sa ilang kahanas sa pagluto, apan nagpakita usab sa panaghiusa ug kusog sa ilang komunidad.
Photo Courtesy to: World Record Academy
