SURIGAO CITY- Nahilandig sa tambalanan ang mag-uuma human kini gitigbas sa silingan, alas 8:29 sa gabii, Agosto 3, 2025, sa Purok 7, Sitio Canlabag, Brgy. Capalayan, Surigao City. Naila ang biktima sa pangalan nga Leo Sumingpan Gumanad, 41 anyos, minyo, mag-uuma, ug residente sa Purok 7, Sitio Canlabag, Brgy. Capalayan, Surigao City.
Samtang ang suspek naila sa pangalan nga si Reymart Tabis Elano, 28 anyos, ulitawo, usa usab ka mag-uuma ug residente sa nasangpit nga barangay. Sa pagkadawat sa taho, ang mga personahe sa Surigao City Police Station ang gilayon miresponde sa lugar aron susihon ang hitabo.
Daling nakasibat na ang suspek paingon sa wala matino nga direksyon. Ang biktima daling gidala sa Caraga Regional Hospital aron matambalan.
Sa imbestigasyon sa kapulisan, nag-inom niadtong tungora ang biktima kauban sa mga silingan. Sumala pa, nga migawas ang biktima aron mopalit ug sigarilyo duol nga tindahan.
Nasugatan niini ang suspek nga adunay dalang sundang. Kalit nga gisukmatan sa suspek ang biktima hangtod nga misangpot sa init nga panaglalis ang komprontasyon.
Gibunlot sa suspek ang iyang sundang ug gitigbas ang biktima sa makadaghang higayon. Sa pagsagang sa biktima nakaangkon og grabeng samad sa lawas ug ulo niini. Samtang gilusad na ang hot pursuit operations aron sa pagpangita ug pagsikop sa suspek.
