ILIGAN CITY- Gisaulog sa Initao District Jail ang usa ka malampuson ug makahuluganon nga selebrasyon sa Nutrition Month 2025 alang sa mga Persons Deprived of Liberty (PDL), ubos sa pangulo ni Acting Jail Warden JSINSP Glen Robert C. Madarieta.
Gitambongan ang kalihokan nila ni Rudy Peralta,ug Florentino Feguracion, ug ang kanunay nga nagsuporta nga Head sa Prison Ministry sa Initao nga si Fe Bagares, nga naghatag ug dugang inspirasyon sa maong adlaw.
Gipasiugda sa selebrasyon ang mga kalihokan nga nagtinguha sa pagpalambo sa kahimsog ug kinatibuk-ang kaayohan sa mga PDL.
Usa sa gipanglantaw nga highlight sa maong kalihokan mao ang Cooking Contest tali sa nagkalain-laing dormitories, diin gipakita sa mga PDL ang ilang abilidad sa pag-andam og masustansya, lamian ug creative food.
Gipaluyohan usab sa intermission numbers nga nagpakita sa ilang talento sa kanta, sayaw, ug spoken word poetry, samtang gipahigayon ang Nutri-Games, usa ka quiz competition nga naglibot sa mga isyu sa nutrisyon ug himsog nga pagpuyo.
Giduso ang kalampusan sa maong selebrasyon pinaagi sa suporta ug donasyon gikan sa mga Local Government Units kun (LGUs) sa Initao, Libertad, Gitagum, Laguindingan, ug Alubijid.
Gipadayag usab sa Jail Management ang ilang kinasingkasing nga pagpasalamat sa tanang ahensya, stakeholders, ug frontliners nga miuban ug misuporta sa paningkamot alang sa rehabilitasyon ug repormasyon sa mga PDL.
Gipanghinaut usab sa Initao District Jail nga ang susamang kalihokan magpadayon matag tuig, isip kabahin sa ilang misyon nga ihatag ug ang kahigayunan sa kabag-ohan, paglaum, ug kahimsog sa sulod sa pasilidad.
