Mitay-og ang magnitude 8.7 nga linog sa silangang bahin sa Kamchatka Peninsula sa Russia. Sumala sa US Geological Survey, ang linog nahitabo sa giladmon nga 19 kilometros ug gibana-bana nga 136 kilometros silangan sa siyudad sa Petropavlovsk-Kamchatsky.
Tungod sa kakusog sa linog, ang mga awtoridad sa Japan, Alaska, Hawaii, ug pipila ka bahin sa Pacific Islands nipagawas ug tsunami advisory.
Gilauman sa Japan Meteorological Agency nga adunay tsunami nga 1 metros ang gitas-on nga moigo sa pipila ka baybayon sa Japan. Sa Russia, daghang mga bilding ang naguba, lakip ang usa ka kindergarten, diin ang mga tawo luwas nga gibakwit sa wala pa malumpag ang mga dingding.
Walay gikataho nga kaswalti, apan padayon ang monitoring sa mga aftershocks ug posibleng dugang kadaot. Ang Hawaii Emergency Management Agency nagpagawas usab ug tsunami watch sa pagpaabot sa posibleng mga epekto sa baybayon.
Ang linog maoy bahin sa kalihokan sa Kuril-Kamchatka Trench, usa ka nailhang subduction zone sa rehiyon. Ang foreshocks nag-una sa nag-unang linog, lakip ang magnitude 7.4 nga linog niadtong Hulyo 20.
Ang mga residente sa mga apektadong lugar gitambagan nga magpabiling alerto ug mosunod sa opisyal nga mga advisory gikan sa mga awtoridad.
Source: Dennis Jamito
photo:ponds5.com
