MALAYBALAY CITY- Narekober sa kapolisan ang iligal nga pagputol sa hardwood nga kahoy nga nagkantidad ug kapin sa P463, 000.00 atol sa anti-illegal logging operation nga gipahigayon sa Sitio Carmen, Butong, Quezon Bukidnon niadtong nakalabayng adlaw.
Kini human girespondihan ang gikataho nga ilegal nga pagpamutol og kahoy sa lugar sa mga personahe sa Quezon Municipal Police Station (MPS), uban sa koordinasyon sa Department of Environment and Natural Resources (DENR)
Sa pag-abot sa grupo sa maong dapit, ang ilang presensiya nakaalarma sa duha ka mga tawo, lakip ang suspetsado nga giilang si alyas “Mery,” usa ka babaye, minyo, ug residente sa maong dapit, uban sa iyang kauban nga nag-operate og chainsaw kung asa daling miikyas ngadto sa duol nga plantasyon sa tubo.
Nadiskubrehan ug nakuha sa grupo ang daghang paltik ug lingin nga mga troso sa Lawaan hardwood nga gibilin sa lugar. Ang nakumpiska nga mga kahoy gibanabanang mosukod sa 3,863 board feet nga gitugyan ngadto sa DENR Office-Quezon alang sa tukmang dokumentasyon ug disposisyon.
Bisan pa sa pag-ikyas sa mga suspetsado, ipasaka ang kasong kriminal batok kanila tungod sa paglapas sa Presidential Decree No. 705, nailhan usab nga Revised Forestry Code of the Philippines.
Source: Quezon Municipal Police Station
