MALAYBALAY CITY- Luwas ra ang kahimtang apan pabiling natrauma ang usa ka babaye human gisulod sa iyang panimalay ug gisulayan paglugos mga alas 3:00 sa kadlawon niadtong milabay nga adlaw, sa Barangay Tankulan, Manolo Fortich, Bukidnon.
Gisaysay sa biktima nga si Ailah Ivy Pabololot Pinalas, nga samtang tulog kini niadtong higayona kalit adunay mitapad kaniya ug migakos, tungod sa iyang kakurat ug didto iyang gisuklan ang suspetsado.
Sumala pa, gisumbag kini sa makadaghang higayon sa nawong, ulo ug ubang parte sa iyang lawas ug gisulayan pagdunggab gamit ang kutsilyo apan naningkamot siyag singgit ug pangayog tabang sa mga silingan.
Human mamatikdi sa suspetsado nga nakamatikod ang mga silingan misibat dayon kini, ug nabiyaan ang iyang kalo nga kolor itom. Usa sa witness ang mibutyag nga gipanag-iya ang maong kalo ni Jun Mark Agid 22 anyos, taga Cagayan de Oro City, kinsa bana sa higala sa biktima nga taga-Manolo Fortich ra usab.
Nakaangkon og mga samad ug bun-og sa lawas ang biktima, samtang ang anak niini nga 5 anyos nakaangkon og trauma tungod sa insidente.
Atol sa hot pursuit operation nadakpan ang suspetsado kinsa gitakdang mag-atubang sa kasong Attempted Rape.
Source: Ailah Ivy Pabololot Pinalas
