MALAYBALAY CITY- Nagpangurog ang komunidad sa Barangay Labuagon, Kibawe, Bukidnon human nakaplagan ang gipatay ug gisunog ang 75-anyos nga babayeng senior citizen niadtong buntag sa Hulyo 26, 2025.
Base sa inisyal nga imbestigasyon sa kapolisan nasuta nga gibunalan ang biktima sa ulo gamit ang palwa sa lubi ug pagkahuman, gisunog ang lawas niini sa dapit sa maong Barangay kung asa nadiskobrehan sa mga otoridad ang nahibiling parte sa lawas ug giturn-over sa pamilya.
Sa pikas bahin misurender usab ang suspetsado nga giilang si alyas “Dodo”, 37 anyos, lumulupyo sa nahisgutang Barangay pinaagi sa tabang sa Lay Minister sa ilang lugar human matud pa nakonsensya ug andam moatobang sa kaso nga ipasaka batok kaniya.
Sa karon gibalhog sa Kibawe Municipal Police Station ang suspetsado samtang nagpadayon ang lawom nga imbestigasyon sa hinungdan sa maong krimen. Gikondena sa lokal nga opisyal ug komunidad ang maong buhat ug nanawagan nga ipatuman ang hustisya alang sa biktima.
Source: Kibawe Municipal Police Station
