MALAYBALAY CITY- Patay ang usa ka Barangay Tanod human gipusil pasado alas 11:45 sa buntag Hulyo 21, 2025 didto sa Kilometro 25, Barangay Iba, Cabanglasan, Bukidnon. Giila ang biktima nga alyas “Renie” 53 anyos, minyo, usa ka laborer ug tanod, residente sa maong lugar.
Sa exclusive nga pakighinabi sa Juander Radyo Malaybalay, gibutyag ni Sitio Chairman Dindo Susosco nga samtang nagtrabaho ang biktima nga namulad sa mais niadtong higayona, kalit kini giduolan sa duha ka lalaki sakay og motorsiklo ug gipusil sa makadaghang higayon nga hinungdan sa iyang hinanaling kamatayon.
Human sa insidente, misibat ang duha ka suspetsado paingon sa direksyon sa Barangay Iba, apan ang usa nakasibat sa wala masayri nga direksyon, samtang ang giingong gunman naabtan ug nadakpan sa mga personahe sa Cabanglasan Municipal Police Station.
Padayon pa ang hugot nga imbestigasyon sa mga otoridad aron masuta ang tinuod nga motibo sa maong krimen. Sa pagkakaron nagpasiugda og Dragnet Operation ang Bukidnon Police Provincial Office sa tibuok probinsya aron sa daling pagsikop laing suspetsado.
