𝐄𝐋𝐄𝐂𝐓𝐑𝐈𝐂𝐈𝐀𝐍 𝐍𝐆𝐀 𝐍𝐀𝐏𝐀𝐋𝐆𝐀𝐍𝐆 𝗣𝗔𝗧𝗔𝗬 𝐒𝐀 𝐏𝐔𝐍𝐔𝐀𝐍 𝐒𝐀 𝐋𝐀𝐍𝐒𝐎𝐍𝐄𝐒

PAGADIAN CITY- Patay nga napalgan ang usa ka electrician human kini naghunos sa iyang kaugalingong kinabuhi, sa usa ka punuan sa lansones, sa Purok Meliton, Barangay Poblacion, San Miguel, Zamboanga del Sur,  niadtong Hulyo 20, 2025.

Giila ang biktima nga si alyas “George”, 26 anyos, lalaki ug gikatahong lumulupyo sa Barangay Lumad, Pagadian City. Unang namatikdan ang patay’ng lawas sa biktima sa usa ka alyas “Rene” samtang siya nanugway ug kabayo sa nahisgutan nga lugar.

Sa inisyal nga imbestigasyon sa PNP San Miguel, katapusan nga nakauban sa biktima ang iyang igsuon nga babaye nga nagpatambal sa usa ka albularyo sa Dimataling, Zamboanga del Sur gumikan sa ginahambin sa biktima nga balatian.

Apan sa ilang pagpamauli mitipas ug agi ang biktima paingon sa Poblacion, San Miguel sa rason nga mulikay sa checkpoint apan wala na kini naka-abot pa sa ilang pinuy-anan.

Dugang pa, ang biktima nakasinati ug anxiety ug depression gumikan sa iyang gihambin nga sakit. Gikumpirma sa San Miguel Rural Health Unit, walay foul play sa kamatayon sa biktima basi usab sa pagsuta nila sa patay’ng lawas niini.