TAGUM CITY- Naangol ang tulo ka mga indibidwal human nabangga ang motorsiklo sa National Highway sa Purok 1, Barangay New Katipunan, Sto. Tomas, Davao del Norte, mga alas 9:58 sa gabii niadtong nakalabay nga adlaw.
Sumala sa Sto. Tomas Municipal Police Station, ang insidente naglambigit sa Kawasaki nga motorsiklo nga adunay sidecar nga gimaneho ni alyas “Vic” 51 anyos, biyudo ug residente sa Purok 11, Barangay New Katipunan.
Kauban niini ang duha ka pasahero nga giilang si alyas “Mar” 46 anyos, ug alyas “Joe” 40 anyos, nga parehong residente sa samang Barangay.
Giila ang ikaduhang sakyanang Honda nga motorsiklo nga gimaneho ni alyas “Jo” 47 anyos, residente sa Purok 11, Barangay Luna, Kapalong.
Matod sa mga awtoridad nga ang usa sa mga nalambigit sa aksidente wala makapakita og driverβs license o vehicle registration ug gidudahan nga ubos sa impluwensya sa ilimnong makahubog atol sa aksidente.
Sa inisyal nga imbestigasyon nasayran nga ang V1 nagbiyahe subay sa KapalongβSto. Tomas Road paingon sa kasadpan paingon sa Sto. Tomas, samtang ang V2 nagpadulong sa atbang nga direksyon.
Sa pag-abot sa lugar nga naaksidente, gikatahong nawad-an og kontrol sa manibela ang drayber hinungdan nga nitipas ang motorsiklo sa pikas lane ug nabangga sa tuong bahin sa kasugat nga motorsiklo.
Naka-angkon ang tulo ka sakay sa motorsiklo og mga samad ug nahatagan og inisyal nga pagtambal sa Municipal Health Office sa Sto. Tomas ug gibalhin sa Davao Regional Medical Center sa Tagum City alang sa dugang medikal nga pag-atiman.
Ang mga sakyanang nalambigit anaa na sa ilawom sa mga otoridad alang sa saktong disposisyon.
