TAGUM CITY- Nadakpan na ang suspetsado kinsa mipusil-patay sa 26 anyos, nga babaye pasado alas-2 sa kadlawon Hulyo 16, 2025 sa girentahan niining apartment sa Prk.28-A, Kawayanan, Brgy. Madaum Tagum City.
Giila ang maong biktima nga si Seannen Gellangarin, kinsa nagbuy-od sa gawas sa kwarto niini diin nakuha sa crime ang tulo ka basiyo sa bala sa .45 calibre nga pistola, usa ka improvised tooter nga adunay sulod nga gituohang shabu, napulo (10) ka gagmayng pakete nga dunay sulod sa gituohang shabu-residue.
Samtang pinaagi sa gipatumang hot pursuit operation sa mga kapulisan sa Tagum City Police Station ubos sa pagdumala ni PLtCol. Frederick Deles, nasikop ang suspek didto sa Millinium Suite, Prk. Dugso, Brgy. San Pedro, Panabo City Davao del Norte.
Giila sa kapulisan ang suspetsado nga usa ka alyas “Jojit” 49 anyos, residente sa Brgy. Apokon dakbayan sa Tagum.
Atol sa gipahigayong operasyon batok sa maong responsable, nakuha sa mga otoridad gikan sa posesyon niini ang usa ka .45 kalibre nga armas, magazine nga puno sa bala, lakip na ang tulo (3) ka pakete sa gituohang shabu nga nitimbang og kapin kon kulang 60 gramos nga nagkantidad P360,000 base sa Standard Drug Price.
Anaa na karon sa kustodiya sa Panabo City Police Station ang maong suspek samtang ginahikay na ang kasong ipahamtang batok kaniya.
ctto: DNPPO
