TAGUM CITY- Nadakpan ang duha ka mga indibidwal sa mga awtoridad sa pagpatuman sa balaod sa Tagum City Davao del Norte tungod sa ilang giingong pagkalambigit sa ilegal nga kalihokan sa sabong, diin usa ka paglapas sa Presidential Decree 449.
Nahitabo ang pagkasikop mga alas 12:50 sa udto, atol sa hiniusang pwersa sa anti-illegal gambling operation nga gihimo sa mga personahe sa Tagum City Police Station, Provincial Special Operations Group, ug 1st Davao del Norte Provincial Mobile Force Company kon DNPMFC.
Giila sa mga otoridad ang mga suspek nga si alyas alyas “Rey”61 anyos, minyo, tricycle driver, ug alyas “Roy” 40 anyos, minyo, usa ka gaming fowl handler.
Ang duha pulos residente sa Purok San Isidro, Barangay Pagsabangan, Tagum City sa giingong probinsya. Nahitabo ang operasyon sa Purok Sta. Cruz, Barangay Pagsabangan, diin nasakpan ang duha ka mga suspek nga nalambigit sa ilegal nga sabong.
Matod sa kapulisan nga ang maong aktibidad direktang nakalapas sa PD 449, nga nailhan usab nga Cockfighting Law of 1974.
Gitanggong ang mga suspek isip kabahin sa padayong pagsumpo sa lokal nga kagamhanan sa syudad sa ilegal nga sugal.
