𝗞𝗔𝗣𝗜𝗡 𝗣𝟴𝟬𝟬𝗞 𝗡𝗚𝗔 𝗞𝗔𝗡𝗧𝗜𝗗𝗔𝗗 𝗦𝗔 𝗦𝗨𝗠𝗚𝗚𝗟𝗘𝗗 𝗡𝗚𝗔 𝗦𝗜𝗚𝗔𝗥𝗜𝗟𝗬𝗢, 𝗡𝗔𝗦𝗔𝗞𝗠𝗜𝗧 𝗦𝗔 𝗦𝗨𝗟𝗧𝗔𝗡 𝗞𝗨𝗗𝗔𝗥𝗔𝗧

KIDAPAWAN CITY- Nasakmit sa mga otoridad ang kapin sa P800K nga kantidad sa smuggled nga sigarilyo sa Brgy. Tinumigues, Lambayong, Sultan Kudarat, niadtong milabayng adlaw.

Sa report bandang ala 1:45 sa kadlawon niadtong Hulyo 13, naharang sa checkpoint ang usa ka puti nga Mitsubishi L300 nga gimaneho ni alyas Amir, 45-anyos, minyo, residente sa Brgy. Libutan, Mamasapano, Maguindanao del Sur, kauban ang usa ka alyas Letra, 40-anyos, minyo ug usa ka aktibong miyembro sa Philippine National Police nga naka destino sa 1st PMFC sa Buluan, Maguindanao del Sur.

Narekober sulod sa nahisgutang sakyanan ang 1,050 reams sa Cannon brand ug 48 reams sa Fort nga sigarilyo nga walay dokumento og anaa sa gibana-banang market value nga 862,808.40.

Samtang, narekober usab sa posisyon sa suspek ang usa ka Glock 17 pistol nga adunay 12 ka buhing bala.

Sa karon, balhog na sa presohan ang mga suspek, samtang ang mga nakumpiskang ilegal nga sigarilyo ug ang gigamit nga sakyanan gidala sa Lambayong Municipal Police Station alang sa documentation ug tukmang disposasyon.