𝐃𝐔𝐇𝐀 𝐏𝐀𝐓𝐀𝐘 𝐇𝐔𝐌𝐀𝐍 𝐆𝐈𝐋𝐔𝐁𝐀 𝐒𝐀 𝐒𝐓𝐎. 𝐓𝐎𝐌𝐀𝐒

TAGUM CITY- Giluba patay ang duha ka mga indibidwal sulod sa usa ka internet cafe didto sa Purok 3, Feeder Road 1, Brgy. Tibal-og, Santo Tomas, Davao del Norte niadtong Hulyo 14, 2025.

Base sa report sa Sto. Tomas Municipal Police Station, giila ang mga biktima nga sila si alyas “Rino” 22 anyos, taga-Purok 1, Menzi, Barangay Tibal-og; ug usa ka alyas “Xander” menor de edad, kinsa parehong mga molupyo sa nahisgutang Barangay.

Samtang ang suspek giilang usa ka alyas “Jan-Jan” 25 anyos, residente sa Katipunan, Sto. Tomas, Davao del Norte, kinsa gituohang tigpayuhot sa iligal nga drugas.

Subay sa imbestigasyon sa kapulisan sa Sto. Tomas, nahitabo ang insidente alas-2:43 sa sayung kaadlawon, diin nakit-an na lamang sa tag-iya sa sulod sa internetan nga dunay nahitabong kaguliyang diin naabtan na lamang niini nga nagkupot ang suspek og usa ka fire extinguisher.

Sa pagpanubay narekober sa crime scene ang fire extinguishers nga maoy gigamit sa suspek sa pagbuga sa mga biktima ug ang usa ka star screw nga maoy gigamit sa pagdunggab niini.

Gilayong gidala sa Municipal Health Center ang mga biktima apan gideklara kining dead on arrival sa balay tambalanan.

Wala na usab ka ipsot ang suspek human kini nadakpan ug gibalhug na sa kustodiya sa kapulisan sa nasangpit nga estasyon.