𝗡𝗗𝗥𝗥𝗠𝗖 𝗠𝗜𝗣𝗔𝗛𝗜𝗠𝗔𝗡𝗚𝗡𝗢 𝗦𝗔 𝗣𝗢𝗦𝗜𝗕𝗟𝗘𝗡𝗚 𝗣𝗔𝗚𝗞𝗔𝗛𝗨𝗟𝗢𝗚 𝗦𝗔 𝗠𝗚𝗔 𝗥𝗢𝗖𝗞𝗘𝗧 𝗗𝗘𝗕𝗥𝗜𝗦 𝗦𝗔 𝗕𝗔𝗝𝗢 𝗗𝗘 𝗠𝗔𝗦𝗜𝗡𝗟𝗢𝗖

Nipasidaan ang National Disaster Risk Reduction and Management Council (NDRRMC) sa posibleng pagkahulog sa mga rocket debris gikan sa Long March 7 nga gitakdang ilunsad pag-usab sa China gikan sa Wenchang Space Launch Site sa Hainan Province.

Base sa advisory nga gipagawas sa NDRRMC, ang paglusad mahimong mahitabo tali sa Hulyo 15 hangtod Hulyo 17, 2025.

Matod sa konseho nga posibleng mahulog ang pipila ka bahin sa rocket sa nagkalain-laing teritoryo sa nasud nga mahimong peligro sa mga mangingisda ug mga marinero.

Pipila sa giila nga drop zones mao ang Bajo de Masinloc, 88 milya gikan sa Cabra Island, Occidental Mindoro; 51 ka milya gikan sa Recto Bank, ug 118 ka milya gikan sa Busuanga, Palawan.

Gitambagan sa NDRRMC ang Philippine Coast Guard, Bureau of Fisheries and Aquatic Resources, ug Department of Environment and Natural Resources – National Mapping and Resource Information Authority nga mag-isyu dayon og tukmang mga pahibalo sa publiko.

Gimandoan sa konseho ang nahisgutang mga ahensya sa pagkonsiderar sa dinaliang pagpatuman sa temporaryong mga pagdili sa pag-isyu sa Notice to Mariners ug Coastal Navigational Warnings sa mga giila nga drop zones.

Gitambagan usab sa konseho ang mga local government units ug ilang mga lokal nga buhatan sa pag-monitor sa sitwasyon sa mga giila nga drop zones.