Milahos pagkahulog sa pangpang ang usaka motorsiklo human nawad-ag control ang driver alas 6:10 kagabii Hulyo 11, 2025 didto sa National Road, Sayre Highway, Sitio Langga, Barangay San Vicente, Sumilao, Bukidnon.
Gimanehoan ang maong Yamaha Aerox nga motorsiklo, kolor cyan blue, sa usa ka 24 anyos nga lalaki, naghupot og PDL, uban sa iyang back rider nga 22 anyos, babaye, pulos residente sa Villa Verde, Iligan City
Sa inisyal nga imbestigasyon nasayran nga ang motorsiklo gikan sa Malaybalay City, paingon sa Iligan City dihang sa pag-abot sa dapit sa insidente, samtang ana-a sa kurbada nga bahin sa karsada, ang atubangang ligid sa motorsiklo nadigyas tungod sa danlog nga dalan rason nawad-an og kontrol sa manibela ang driver ug natumba sa tuong bahin sa shoulder lane dayong nahulog sa pangpang nga adunay gibanabanang gitas-on nga 90 feet.
Maayo na lang kay nakaambak ang driver ug ang iyang backrider una pa nahulog sa pangpang ang motorsiklo hinungdan nakaangkon og minor injuries sa managlahing parte sa ilang lawas ug daling gihatod sa balay tambalanan alang sa medikal nga atensyon.
Sa karon, nakuha na gikan sa pangpang ang motorsiklo kung asa anaa na sa kustodiya sa Sumilao Municipal Police Station.
