MALAYBALAY CITY- Nagkatag sa kalsada ang mga kargang gatas sa usaka Elf Wing Van Truck, kolor puti, sa Suarez Hills By-Pass Road Casisang Malaybalay City, Hulyo 10, 2025.
Sa inisyal nga imbestigasyon nasayran nga nagbiyahe ang sakyanan gikan syudad sa Cagayan de Oro padulong unta sa dakbayan sa Malaybalay ug Valencia aron modeliver sa mga kargamento, apan pag-abot sa lugar nahitaboan, nawad-an ug brake ang maong sakyanan hinungdan nga miambak ang drayber ug pahinante niini.
Nipadayon sa pag-abante ang maong sakyanan nga walay driver, hangtod nabundol ang laing Wing Van nga katagbo sa dalan rason nga mingtakilid ug natumba kini. Gikataho nga nagrabehan sa maong aksidente ang pahinante nga daling gidala sa tambalanan kauban ang drayber.
Gibana-banang mokabat sa 2 milyones ka pesos ang damyos sa mga produkto nga gipanguha sa mga residente sa lugar ug wala pay labot sa sakyanan nga naguba.
Sa karon padayon pa ang gihimong imbestigasyon sa kapolisan pagsuta sa kinatibuk-ang tinubdan sa maong insidenti.
