Nagtuo ang mga representante sa House prosecution panel nga daghang mga Pilipino ang magbag-o sa ilang huna-huna sa impeachment case batok kang Bise Presidente Sara Duterte sa higayon nga masugdan na ang aktuwal nga husay sa Senado.
Matod ni Rep. Leila de Lima (Mamamayang Liberal party-list) ug Batangas Rep. Gerville Luistro, ang pagpakita og ebidensiya sa publiko maoy yawe sa pagsabot sa kabug-at sa mga alegasyon batok sa Bise Presidente.
Si De Lima niingon nga masaligon sila nga kon makita na ang ebidensiya, mausab na ang panglantaw sa pipila nga kasamtangang supak sa impeachment. Matod niya nga basin naimpluwensiyahan sila sa disinformation ug pipila ka mga pamahayag sa mga senator-judges nga daw nag-prejudging bisan wala pa’y trial.
Si Luistro niinsistir nga ang pito ka articles of impeachment dunay igong ebidensiya. Kung sugdan na ug presentar ang mga ebidensiya ngadto sa publiko, pipila ka mga magbabalaod nagtuo nga daghang mga Pilipino ang mabag-o ang panglantaw. Mao nga hinungdanon nga ipadayon ang pagsulay.
Ang mga senador maoy magsilbi nga huwes sa husay nga maoy magdeterminar kon sad-an ba o dili si VP Duterte sa mga pasangil batok kaniya.
